MAAMOOL

Din kinare shaam khadi hai…
…………………………….
Shaaney par ek jaal thakan ka
Haath mein machhli maayusi ki
Maahi lekar aayega

Shaam ki kaali sooni aankhein phir dariya bun jaayengi
Khaali aankh se maahi bhi sooney ghar ko taakega
…………………………………

Raat ki tooti thaali mein phir
Maayusi paros ke shaam
Maahi ke peedhey ke aagey chupke se sarkaa degi
Khaamoshi ke ghont ke saath maahi usko khaayega
……..tooti khaat pe sapno ki phir chupke se so jaayega
Shaam bhi andherey ke motey bistar mein dhuns jaayegi

Kal phir subah hogi aur____
Maahi jaal ummeed ka lekar
Din ke samundar jaayega
……………

Shaaney pe ek jaal thakan ka
Haath mein machhli maayusi ki
Maahi lekar aayega…
Laut ke jab vo aayega!!!!!!!!!!!!!